Kinect Overload!

Ika-29 ng Agosto, 2014
Miyerkules

6:30AM- Nagising ako dahil sa nararamdaman kong init. Hindi init ng panahon,kundi init mismo sa loob ng katawan ko. Masyado yatang nasisiyahan ang sakit sa pananatili sa loob nito. Mabuti na lang at suspendido ang klase. Pero kahit walang pasok, may lakad ako ngayon. Oo, kahit medyo masama ang pakiramdam ko, may lakad pa rin ako.

Pupunta kami sa SM Dasmariñas ng mga kaibigan ko. Gagawin namin ang Kinect na activity sa Filipino. Iyon 'yung may sumasayaw sa screen tapos gagayahin mo. May sensor lang. Excited ako.Haha.

Hindi naman bago sa'kin ang mag-kinect/X-box kasi kamakailan lang din noong napagtripan namin 'yung gawin sa Walter Trece. Ang kaso, tiyak na iba pa rin sa pakiramdam kasi may magvivideo mamaya at mas maraming tao ang nasa arcade ng SM kumpara naman sa  Walter.

Bukod doon, excited din ako kasi napagdesisyunan namin na kakain kami  sa Jollibee.Miss na miss ko na kasi ang chicken joy sa Jollibee. Haha.

11AM ang usapan namin. Halos isang oras ang byahe ko papuntang SM Dasma, pero 10AM, maliligo pa lang ako. Late na tuloy akong dumating sa 7 11 sa Trece kung saan kami magkikita ni Patti.

Okay lang.Kahit late kami, kami pa rin ang pinakaunang dumating.Syempre alam na, Filipino time eh. Pero dumating din naman agad sina Nica at Jheck.

Nang makumpleto kami,dumiretso agad kami sa Quantum.Ito na--Face the Challenge.Doon namin nakita ang mga iba pa naming kaklase na katatapos lang magsayaw.Sayang at hindi namin sila napanood.

Bumili na agad kami ng token. Ilang minuto rin kaming naghintay dahil may ibang sumasayaw doon sa lugar ng Kinect.

Kaming dalawa ni Nica ang magkapartner. Syempre, practice muna. Sumayaw kami sa isang kanta na ang title ay Fergalicious. Easy lang muna ang stage na pinili namin.

Sa totoo lang, nakakahiya. 'Yung mga nagsasayaw kasi na naabutan namin, mukhang araw-araw tambay sa SM Quantum at nagkikinect palagi. Kabisado na kasi nila ang mga steps.

Pero mas nakakahiya ang isang sitwasyon. Hindi kasi namin makontrol ang sensor ng maayos. Hindi namin alam kung hindi lang ba kami ma-detect o sadyang hindi kami marunong gumamit. Nauubos tuloy ang oras namin. Nakailang hulog kami ng token. Tinatawanan na kami ng ibang kaklase namin. Pati ako, natatawa sa amin. Baka isipin ng mga tao doon, taga-bundok kami. Hahaha. Tinulungan na lang kami ng mga Kuya doon. Hindi sila staffs. Sila 'yung sinasabi kong araw-araw na yatang tambay sa SM.

Nang sumasayaw na kami, syempre, more hiya pa. Nakakatawa 'yung ibang steps. Pero wala na kaming pakialam sa mga taong nanonood sa'min. Hindi na namin 'yon naiisip habang sumasayaw. Basta, nag-eenjoy kami.

Pagkatapos naming sumayaw sa kantang Fergalicious, pinauna namin sina Jheck na kapartner si Patti at sumayaw sa tugtuging Massive Attack.

Like a G6 ang ginamit naming kanta sa sayaw namin na kunuhanan ng video.

Matapos naming gawin ang activity, naglaro pa kami ng iba. Basketball, dance revolution at kung ano pa man tawag doon sa iba.

Hindi nagtagal, nakita naming walang taong gumagamit  sa isa pang kinect sa SM Quantum. Marami pa kaming tokens kaya sumayaw ulit kami. Ngayon, puro trip lang. Mas maganda pa nga yata ang kinalabasan ng trip kasi mas todo galaw kami. Puro 'hard' ang pinili naming stage at todo galaw kami para magaya ang steps. Mahirap pero nakakatuwa na nakakatawa.

Hindi ko na mabilang kung ilang beses akong sumayaw at ilang tokens pa ang naihulog namin. Basta, nakasama ko sa sayaw si Nica, si Jheck, si Patti at pati na rin si Christian. Nakakapagod. Aircon sa mall, pero pinagpapawisan ako.

Medyo naramdaman ko na naman 'yung lagnat ko pero hindi ko pinansin. Iinom naman ako ng gamot mamaya eh. Hindi ko alam kung ilang oras kaming nagsayaw doon. Basta, 2PM na kami kumain sa Jollibee.

Nagikot-ikot rin kami sandali at kumain ng ice cream bago tuluyang umuwi.

Sobrang nakakaenjoy ang X-box/Kinect. 'Yung tipong kahit ang tao na hindi mahilig sumayaw o hindi marunong suayaw ay maaadik sa larong ito. Kung meron lang nito sa bahay namin, ang payat ko na siguro.

Ang sarap yayain ng iba mo pang kaibigan. Siguro, tuwing pupunta kami sa SM lalo na't ang mga kaibigan ko ang kasama ko, yayain ko silang magkinect.  Iyon na ang pinakagusto ko sa arcade.

Pag-uwi ko, syempre alam na.Nabinat ako.

Anyare?

Ika-23 ng Agosto, 2014
Saturday

"Is everything ready?"

"Yes, sir."

Abala ang lahat.Takbo rito,takbo roon.Pabalik-balik.Nakakahilo. 

Nakaupo ako sa isang tabi kasama ang mga kamiyembro ko.

Hindi ko malaman ang gagawin ko.Unang beses ito. Hindi ko rin malaman kung paano ako nasali sa grupong ito.

SNSD Girl's Generation. Isang K-POP group.

Uulitin ko.Hindi ko talaga alam kung paano ako napasali dito.Nakapanood lamang ako ng mga videos nila.

Maririnig ang sigawan ng mga tao sa labas mula rito sa backstage.

May concert kasi kami ngayon dito sa Pilipinas.

Maya-maya lang, naghanda na kami sa likod ng entablado.

Bumukas ang kurtinang makapal.

Lumiwanag ang buong entablado.

Lalong lumakas ang sigawan ng mga tao.

Tumugtog ang kanta namin na pinamagatang "I Got A Boy."

Lahat kami, todo sa pag-indak at pagkanta.

Nawala ang kabang nararamdaman ko kanina.

Masaya kaming nagpeperform sa entablado.

Sinisigaw ng mga tao ang mga pangalan namin.

Nagkatinginan kami ng kamember ko na si Hyoyeon. Nginitian niya ako.

Natapos ang tugtugin.

Kanya-kanya kaming project para sa last pose namin bago muling umalis sa entablado. 

Kailangan naming maghanda para sa susunod na bilang.

Tinawag ako ng manager namin ng may ngiti sa labi.

Naglakad ako papalapit sa kaniya.

Ilang hakbang na lang bago ako makarating sa lugar niya ng may naramdaman akong kung ano sa kili-kili ko.

Maya-maya, tumunog ito.

"38.5.Tsk."

Unti-unti kong idinilat ang mga mata ko.

Nasa tabi ko si mama habang hawak-hawak ang digital thermometer.

"Anong nararamdaman mo?"

"Masakit po ulo ko."

"38.5 degrees na lagnat mo."

Tumayo siya,Pumunta sa kusina at nagbasa ng tuwalya.

Napahawak ako sa noo ko. Sobrang init.

Panaginip pala ang kanina.

Medyo natawa pa rin ako ng bahagya kahit masama ang pakiramdam ko.

Member ako ng SNSD? Anyare?

----

Ika-24 ng Agosto, 2014
Sunday

Ang sama ng pakiramdam ko. Umabot na sa 39.3 ang lagnat ko base sa huling check kanina.

Inirekomenda ng ate ko na ipacheck-up ako bukas. Pero ayoko.

Baka tusukin ako ng karayom. Nakakatakot.

Ayoko talaga ng karayom.

"Ate, pwede namang hingian ng certification 'yung doktor para ma excuse siya kung aabsent siya 'di ba?"

Narinig kong tanong ni mama kay ate mula sa kwarto ko.

Sa totoo lang, buong araw na akong nakahiga sa kwarto ko. Nakakangalay.Tapos ang ulo ko, parang bibiyakin sa sakit.

Pero ano raw?Aabsent ako?

Hindi pwede!Midterm namin sa PE!Maglalaro pa kami ng doubles sa badminton.

Nag-vibrate ang phone ko. Nagtext si Ate Lovely. Hindi siya makakapasok ng ilang weeks kasi may bulutong siya at mataas din ang lagnat.

Binitawan ko ang phone ko. Ang malas naman namin.

Pero thanks God. Gumaling ako nang Tuesday.

Nakapasok ako.

Pero pagdating ko sa quadrangle,wala ang mga kaklase ko maliban kay Danielle Patrice Fabito.

Ang sabi niya, hindi raw natuloy ang laro sa PE at pwede ng umuwi.

Niyaya ko na siyang umuwi dahil kailangan ko pa ngang magpahinga.Kagagaling ko lang sa sakit.

Tinanggihan niya ako. Niyaya niya akong manood ng mga nagpaparaktis ng ballroom dancing para sa Intramurals.

Nagtalo kami.

Ngunit, dumating si ate Lovely.

Naka-uniform.

Pero mukhang hindi pa siya magaling.

Pumasok siya kahit may mga bulutong pa at kahit mataas pa ang lagnat.

Lumapit kami sa kaniya.

Ang sabi niya, ayos lang naman siya at hindi nakakahawa ang bulutong.

Hinawakan niya ang kamay ko at niyakap.

Niyakap ko rin siya ng nakangiti.

Napabalikwas ako sa kama.

Napatingin ako sa paligid ko.

Walang nagpapraktis ng ballroom.Wala si Patti,wala si ate Love. 

Hindi ito quadrangle.

Anyare?

Napatingin ako sa tabi ko.

Nandoon ang cellphone na kani-kanina lang ay binitawan ko.

----

Ika-25 ng Agosto,2014
Monday

Lunes ngayon pero walang pasok.

Dapat nasa SM Dasma ako kasama ang mga kaibigan ko.

Magkikinec pa naman sana kami.

Kaso hindi ako pinayagan. Sa Wednesday na lang daw. Kailangan ko munang magpacheck-up.

Di bale, may libreng oras pa naman kami sa Miyerkules.Magpapacheck-up na nga lang muna ako kasi baka lumala pa ang sakit ko.

Natatakot sila. Baka raw nadengue ako.

Natatakot rin ako.

Baka kasi tusukin ako ng karayom.

Pero pinagalitan ako.Para daw akong bata.

Sa huli, syempre, magulang ko ang nasunod. Kasama ko sina papa at mama papunta sa M.V Santiago.

Mabilis kaming nakapagpalista pagdating doon.

Pang-anim ako sa nakalista.

Nakakahiya.Ako ang pinakamalaki sa mga batang nakapila sa Pediatrician.

Hawak ko ang laboratory request form na binigay ng nurse kanina.

CBC,Platelet count at Urinalysis.

Sabi na nga ba, may blood test.

Kinakabahan ako sa karayom.

Naupo muna kami sa mga upuan sa labas ng room ng doktor na magchecheck-up.

Hihintayin namin siya dahil 1PM pa raw darating.

Nagbasa na lang ako ng ebook sa phone.

Maya-maya, kinalabit ako ni papa.

Andiyan na pala ang doktor.

Lalo akong kinabahan.

Karayom.Karayom.Karayom.

Hindi nagtagal, tinawag na ang pang ika-anim. Ako 'yun. 

Pumasok ako sa loob ng silid na iyon kasama ang mama ko.

Bumungad sa akin ang doktor na mataba. Maliit. Maputi ang buhok.

Masama ang tingin sa akin.

Mas kinabahan yata ako sa kaniya kaysa sa karayom.

Hindi pa man ako nakakaupo, nagsalita na siya.

"No facebook!Bawal magpuyat!No cellphone allowed."

Kinuha niya ang reseta at kung anu-anong pinagsusulat.

"Bilhin niyo 'yan lahat,Pumunta ka na sa laboratory para sa blood test at urinalysis."

Lumabas kami ng silid.

Nagtataka ako sa inasal ng doktor pero mas nagtataka ako sa reaksyon ni mama. 

Parang wala lang.

Dumiretso kami sa laboratory.

Sinalubong ako ng nurse.

"Ikaw ang magpapablood test?"

"Opo."

Nilabas niya ang karayom na kasinghaba ng lapis.

Lalo akong nagulat.

Tatakbo na sana ako pero hinila niya ako pabalik.

Napaharap ako kay---

mama na katabi ko sa upuan.

"Una ang laboratory bago check-up. Para raw pagdating ng doktor, may resulta na ang lab.Tara na."

Tumayo na kami at naglakad papuntang laboratory.

Ngayon pa lang kami pupunta at wala pa talaga ang doktor.

'Yung kanina?Salamat at panaginip lang.

Kinabahan ako sa karayom. 

Singhaba naman kasi ng lapis.Anyare?

----